Ўзбекистон дзюдо терма жамоаси яккалик баҳсларни медалсиз якунлади
Венгриянинг Будапешт шаҳрида бўлиб ўтаётган катталар ўртасидаги жаҳон чемпионатидаги яккалик беллашувлар якунига етди. Бугунги кун дастурида оғир вазн тоифасидаги (аёллар +78 кг, эркаклар +100 кг) баҳслар ўтказилди.
Ўзбекистон терма жамоасидан сўнгги умид сифатида татамига чиққан Ирисхон Қурбонбоева, Музаффарбек Тўрабоев ва Алишер Юсупов бу гал ҳам медаллар учун курашни давом эттира олишмади.
Қурбонбоева биринчи даврани муваффақиятли бошлаган бўлса-да, иккинчи босқичда япониялик рақибасидан ютқазди. Олимпиада совриндори Музаффарбек Тўрабоев IJF байроғи остида курашаётган россиялик Инал Тасоевга мағлуб бўлди. Алишер Юсупов эса таниқли чехиялик дзюдочи, икки карра Олимпиада ва жаҳон чемпиони Лукаш Крпалек билан драматик баҳсда ютқазди — икки юко билан олдинда бораётган дзюдочимиз қарши ҳужум пайтида мағлубиятни қабул қилди.
Шу тариқа, Ўзбекистон терма жамоаси 2018 йилдан буён илк бор жаҳон чемпионатини медалсиз якунлади. Айтиш керакки, бу йил жамоада мураббийлар штаби янгиланди, спортчиларнинг кўпчилиги учун эса бу дебют чемпионат бўлди.
Барча умидлар энди бугунга бўлиб ўтадиган аралаш жамоавий баҳсларга боғланган. Ўзбекистон терма жамоаси мусобақани Туркманистонга қарши дуэль билан бошлайди.
