Ўзбекистон делегацияси Германияда допингга қарши кураш соҳасида ҳамкорлик масалаларини муҳокама қилди
Ўзбекистон Миллий антидопинг агентлиги директори бошчилигидаги делегация — Бош прокуратура ва Спорт вазирлиги вакиллари билан бирга — Германияда хизмат сафарида бўлиб турибди. Сафар доирасида делегация допингга қарши кураш соҳасидаги миллий қонунчиликни такомиллаштириш, тергов ишларини ташкил қилиш ва спортчилардан намуна олиш жараёнини яхшилаш масалаларида Германия тажрибасини ўрганмоқда.
Ташриф давомида делегация Германия антидопинг агентлиги раҳбари Ларс Морцфайфер ҳамда Кёльн Био кимё институти (антидопинг лабораторияси) директори Марио Тевис билан учрашди.
Музокараларда допинг қоидаларини бузганлик учун жавобгарликни кучайтириш, спортчиларнинг биологик паспортларини юритиш, қоидабузарлик ҳолатларини аниқлаш тизимини жорий этиш каби масалалар кўриб чиқилди. Шунингдек, ўзбекистонлик мутахассислар учун амалиётлар ташкил этиш, уларнинг малакасини ошириш юзасидан келишувга эришилди.
Бундан ташқари, спортчиларнинг биологик паспортларини тўлдириш ва таҳлил этиш мақсадида Кёльнда қўшимча лаборатория текширувлари ўтказиш ҳамда фармакология соҳасида қўшма илмий тадқиқотлар олиб бориш имкониятлари муҳокама қилинди.
Учрашув якунида Германия антидопинг агентлиги ва Кёльн Био кимё институти билан ҳамкорлик меморандумларини имзолаш, шунингдек, тест натижаларини таҳлил қилиш бўйича шартномалар тузишга келишилди.
