Ўзбекистон човкен терма жамоаси Шеки шаҳрида халқаро мусобақада гуруҳ босқичини биринчи ўринда якунлади
2025-йилнинг 25-сентябр куни Ўзбекистон Човкен терма жамоаси Озарбайжоннинг Шеки шаҳрида бўлиб ўтаётган халқаро Човкен мусобақасида иштирок этиш учун етиб борди. 27-сентябр куни мусобақанинг расмий қуръа ташлаш маросими ўтказилди. Қуръа натижаларига кўра, Ўзбекистон терма жамоаси “B” гуруҳидан ўрин олиб, Қозоғистон ва Туркия терма жамоалари билан бир гуруҳга тушди.
Гуруҳ босқичидаги беллашувлар:
28-сентябр куни жамоамиз гуруҳдаги илк ўйинини Қозоғистон терма жамоасига қарши ўтказди. Жуда муросасиз ва шиддатли ўтган учрашувда Бердиёр Айдаров томонидан урилган ягона гол жамоамизга муҳим ғалабани тақдим этди. Учрашув 1:0 ҳисобида якунланди.
30-сентябр куни гуруҳ босқичининг сўнгги ўйинида Ўзбекистон човкенчилари Туркия терма жамоасига қарши майдонга тушишди. Йигитларимиз юксак маҳорат ва жамоавий ўйин кўрсатиб, 4:0 ҳисобида йирик ғалабага эришишди. Мазкур ўйинда Фирдавс Асралов хет-трик (3 та гол), Асқад Ботиралиев эса 1 та гол муаллифи бўлди.
Натижада Ўзбекистон терма жамоаси гуруҳ босқичини 1-ўрин билан якунлаб, ярим финал босқичига йўл олди. Катта эҳтимол билан, ярим финалда жамоамиз Баҳрайн ёки қўшни Қирғизистон терма жамоасига қарши майдонга тушади.
Терма жамоамизга мусобақанинг кейинги босқичларида омад тилаймиз!
