“Янги Ўзбекистон Олимпия чўққилари” мусобақасининг иккинчи босқичи олдидан видеоселектор ўтказилди
Ўзбекистонда ёш спорт истеъдодларини қўллаб-қувватлаш ва саралаб олишга қаратилган “Янги Ўзбекистон Олимпия чўққилари” мусобақасининг иккинчи босқичи бошланиш арафасида. Ушбу босқични самарали ташкил этиш мақсадида Ўзбекистон Республикаси Президентининг спорт бўйича вакили Одил Абдураҳмонов раҳбарлигида видеоселектор йиғилиши бўлиб ўтди.
Онлайн йиғилишда Спорт вазирлиги, Миллий Олимпия қўмитаси раҳбарлари ҳамда спорт федерациялари вакиллари иштирок этишди. Кун тартибида биринчи босқич якунлари, иккинчи босқич мусобақалари учун спорт иншоотларининг ҳолати ва тайёргарлик жараёнлари муҳокама қилинди.
Йиғилиш давомида масъулларга ҳудудий босқичларни юқори савияда ташкил этиш, мусобақаларда шаффофлик ва холис ҳакамликни таъминлаш, олдинги камчиликларни бартараф этиш ҳамда иштирокчилар учун қулай шароит яратиш юзасидан аниқ вазифалар юклатилди.
