Волейбол. Самарқандда ўқув-йиғин базаси ташкил этилди
Самарқанд вилояти Спорт бошқармаси, Самарқанд давлат педагогика институти ҳамда Ўзбекистон волейбол федерацияси ҳамкорлигида, Самарқанд спортнинг ўйин турлари ва енгил атлетикага ихтисослашган спорт мактаби негизида Ўзбекистон миллий терма жамоаси ҳамда Самарқанд вилояти терма жамоалари учун ўқув-йиғин машғулотлари базаси ташкил этилди.
Мазкур база замонавий шароитлар асосида йўлга қўйилиб, спортчиларни сифатли тайёрлаш ҳамда мусобақаларга пухта ҳозирлаш имконини яратади.
Жорий йилнинг 20-февралидан бошлаб ушбу базада U-18 ўғил болалар терма жамоаси ўқув-йиғин машғулотларини ўтказади. Шунингдек, ҳамкорликни мустаҳкамлаш мақсадида Ўзбекистон волейбол федерацияси, спорт мактаби ва институт ўртасида ўзаро ҳамкорлик меморандуми имзоланди.
Мазкур ҳужжат волейбол спорт турини ривожлантириш, илмий-амалий ёндашувни кенгайтириш ва ёш спортчиларни тизимли тайёрлашга хизмат қилади.
