Волейбол. Пискент туманида ўқувчи қизлар ўртасида волейбол мусобақаси ўтказилди
Тошкент вилояти Пискент туманидаги 10-сонли умумтаълим мактабида ўқувчи қизлар ўртасида волейбол бўйича мусобақа ташкил этилди. Мазкур спорт тадбири ёшларни жисмоний фаолликка жалб этиш, уларнинг бўш вақтини мазмунли ташкил этиш ҳамда волейбол спорт турига бўлган қизиқишини ошириш мақсадида ўтказилди. Мусобақада 7-, 8-, 9-, 10- ҳамда 11- синф жамоалари иштирок этиб, майдонда қизғин ва муросасиз баҳслар кечди. Ҳар бир жамоа ўзининг жамоавий ўйини ва спорт маҳоратини намоён этди.
Беллашувлар якунига кўра, 8-“Б” синф жамоаси барча рақибларидан устун келиб, мусобақанинг ғолиби бўлди. Ғолиб жамоа ҳомийлар томонидан диплом ҳамда қимматбаҳо совғалар билан тақдирланди.
Бундай спорт тадбирлари ёшлар ўртасида соғлом турмуш тарзини тарғиб қилиш, уларни спортга кенг жалб этиш ҳамда волейбол спорт турини янада оммалаштиришга хизмат қилмоқда.
