Voleybol. Piskent tumanida o‘quvchi qizlar o‘rtasida voleybol musobaqasi o‘tkazildi
Toshkent viloyati Piskent tumanidagi 10-sonli umumta’lim maktabida o‘quvchi qizlar o‘rtasida voleybol bo‘yicha musobaqa tashkil etildi. Mazkur sport tadbiri yoshlarni jismoniy faollikka jalb etish, ularning bo‘sh vaqtini mazmunli tashkil etish hamda voleybol sport turiga bo‘lgan qiziqishini oshirish maqsadida o‘tkazildi. Musobaqada 7-, 8-, 9-, 10- hamda 11- sinf jamoalari ishtirok etib, maydonda qizg‘in va murosasiz bahslar kechdi. Har bir jamoa o‘zining jamoaviy o‘yini va sport mahoratini namoyish etdi.
Bellashuvlar yakuniga ko‘ra, 8-“B” sinf jamoasi barcha raqiblaridan ustun kelib, musobaqaning g‘olibi bo‘ldi. G‘olib jamoa homiylar tomonidan diplom hamda qimmatbaho sovg‘alar bilan taqdirlandi.
Bunday sport tadbirlari yoshlar o‘rtasida sog‘lom turmush tarzini targ‘ib qilish, ularni sportga keng jalb etish hamda voleybol sport turini yanada ommalashtirishga xizmat qilmoqda.
