Велоспорт. Ўзбек спортчилари мазкур босқични 1 та олтин ва 1 та бронза медали билан якунлашди

Туркия давлати мезбонлигида ўтган "Tour of Antalya" кўпкунлик мусобақасининг якуний босқичига якун ясалди.

Қувонарлиси, Ўзбекистон миллий терма жамоаси аъзолари мазкур босқични 1 та олтин ва 1 та бронза медали билан якунлашди. 142,5 км масофада ўтган гуруҳ пойгасида Сергей Ростовцев барчани ортда қолдириб финишга биринчи бўлиб етиб келди ва олтин медалга эга чиқди.

Шу билан бирга, кучли учликни якунлаб берган Никита Светков бронза медали билан мусобақани якунлади. Албатта, бундай натижанинг ортида жамоавий ҳаракат, меҳнат ва ғалаба сари биргаликда интилиш ётибди. Ўз навбатида йигитлар билан ишлашда тинимсиз меҳнат олиб бораётган мураббийлар штаби, хусусан, Владимир Старчикни ҳам қўлга киритилган натижа билан табриклаймиз.

Иброҳим Жалолов

Редактор