Умар Нурмагомедов RAF’да Юрайа Фейберга қарши курашади
UFC’нинг енгил вазн тоифаси вакили Умар Нурмагомедов Real American Freestyle (RAF) промоушенидаги дебютини ўтказади. MMA Fighting маълумотига кўра, россиялик спортчи 14 ноябрь куни Абу-Дабида UFC афсонаси Юрайа Фейберга қарши эркин кураш баҳсида гиламга чиқади.
Баҳс Абу-Дабидаги “Etihad Arena”да ташкил этиладиган RAF турнири доирасида бўлиб ўтади. Промоушен вакиллари Нурмагомедов билан шартнома имзоланганини ва унинг илк рақиби айнан 47 ёшли Фейбер бўлишини тасдиқлаган.
Фейбер учун бу RAF’даги учинчи чиқиш бўлади. Америкалик спортчи аввалги икки баҳсида Генри Сехудо ва Арман Сарукян билан куч синашган ва ҳар икки учрашувда техник устунлик билан мағлуб бўлган. Шу тариқа, Фейбер ҳам ташкилотдаги илк ғалабасини қўлга киритишга уринади.
Маълумот учун, RAF Abu Dhabi турнирининг асосий баҳсида Колби Ковингтон ва Хамзат Чимаев ўзаро курашади. Ковингтон круизер вазн тоифасидаги RAF камарини ҳимоя қилади.
