Царукян: Камар учун жанг қилмаганимни адолатсизлик деб билмайман
UFC’нинг ёш ва иқтидорли жангчиси Арман Царукян унга 70 кг гача бўлган тоифада чемпионлик жангини беришмаслиги масаласига муносабат билдирди.
— Сиз мағлуб этган Чарльз Оливейра ҳозир Топурияга қарши камар учун жанг қилади. Бу ҳолатни сизнинг манфаатларингизга нисбатан адолатсизлик деб ҳисобламайсизми? — деган саволга Царукян шундай жавоб берди:
— Йўқ, мен бундай деб ўйламайман. Чунки чемпионлик жангини ўз қўлим билан йўқотдим. Оливейра менинг ортимда эди, аммо у ноябрда Чендларни мағлуб этган ва ўз навбатида яхшигина имкониятни қўлга киритган. Энди у камар учун жанг қиляпти — буни тўлиқ тушунаман.
Топурия эса ярим енгил вазн тоифасидан юқори тоифага ўтган ва унга ҳам шундай имконият керак. Мен бундай вазиятни аввалдан кўзлаганман. Ҳозирча кутишга тўғри келади, — деди Царукян.
