Тошкент самбо бўйича нуфузли турнирга мезбонлик қилади
Жорий йилнинг 14-апрелидан 20-апрелигигача Тошкент шаҳрида самбо бўйича Осиё-Океания чемпионати бўлиб ўтади. Беллашувлар “Юнусобод” спорт мажмуасида ташкил этилади.
Баҳсларда Осиё ва Океания минтақасининг 25 га яқин мамлакатидан 600 нафардан ортиқ самбочи иштирок этиши кутилмоқда.
Жанглар 14-апрел куни соат 09:00 да старт олади. Куннинг биринчи ярмида саралаш баҳслари ўтказилса, соат 16:00 дан сўнг медаллар учун жанглар бўлиб ўтади.
Шунингдек, турнирнинг очилиш маросими 15-апрел куни соат 16:00 да бошланади.
Мусобақа қуйидаги йўналишларда ташкил этилади:
- Катталар ўртасида самбо ва жанговор самбо (эркаклар ва аёллар)
- Ёшлар ўртасида самбо ва жанговор самбо (йигитлар ва қизлар)
- Ўсмирлар ва кадетлар ўртасида самбо (йигитлар ва қизлар)
- Кўзи ожизлар ва заиф кўрувчилар ўртасида самбо
- Спорт усталари (фахрийлар) ўртасида самбо
