Тошкент-2026 кашфиётлари: Оилавий ғалабани таъминлаган мексикалик Мануэл Кортес
Тошкентда ўтказилган таэквондо WT бўйича ёшлар ўртасидаги дунё биринчилигининг тўртинчи кунида (15-апрель) Мексика терма жамоаси аъзоси Гильермо Мануэл Кортес Лабастида -59 кг вазн тоифасида олтин медални қўлга киритиб, ёрқин ғалабага эришди.
Финал баҳсида у кореялик Жи Ун Ханни мағлуб этиб, нафақат шахсий муваффақият, балки ҳақиқий оилавий зафарни ҳам таъминлади. "Кота"нинг отаси бутун турнир давомида мураббий сифатида унинг ёнида бўлди, акаси Карлос Дамиан Кортес Лабастида эса асосий спарринг ҳамкор ва илҳом манбаи бўлиб хизмат қилди.
"Мураббийим отам бўлгани жуда ажойиб… Ғалаба — бу улкан меҳнат натижаси”, — дейди спортчи.
Кадетлар ўртасида икки карра жаҳон чемпиони бўлган Кортес Лабастида ёшлар тоифасига ўтишда қийинчиликларга дуч келган, бироқ интизом ва кунига уч маҳал машғулотлар унинг янги даражага чиқишига сабаб бўлди.
"Кота"нинг таъкидлашича, ёшлар тоифасида баҳслар янада кескинлашади, рақиблар эса кучлироқ ва бўй жиҳатдан устунроқ бўлади, бу эса максимал диққат ва пухта тактик тайёргарликни талаб қилади. Олдинда мексикалик спортчини катталар даражасидаги дебют ва йирик халқаро мусобақалар, жумладан, Панамерика чемпионати ҳамда ёшлар ўртасидаги Олимпия ўйинлари кутмоқда.
Тошкент кашф қилган Мануэл Кортес аллақачон Мексика таэквондосининг энг ёрқин ёш истеъдодларидан бири сифатида эътироф этилаётганини алоҳида таъкидлаш лозим.
