Топурия Гейжи билан жанг ҳақида: «Ойнага қараб ўзимни танимадим»
Топурия Гейжи билан жанг ҳақида: «Ойнага қараб ўзимни танимадим»
Грузиялик жангчи фаолиятидаги илк мағлубият ҳақида батафсил тўхталди.
UFC собиқ чемпиони Илия Топурия Жастин Гейжи билан жангда олган жароҳатлари ҳақида гапирди.
«Кўп йиллар давомида мен фақат битта ҳисни — ғалабани билардим. Профессионал даражада 18 та жанг ўтказдим, уларнинг 17 таси мен хоҳлаганимдек якунланган, биттаси эса — йўқ.
Профессионал фаолиятимда биринчи марта мағлуб бўлдим. Ўша кеча спортнинг аввал ҳеч қачон дуч келмаган томонини ўзим учун кашф қилдим: икки кўз косаси суягининг синиши, буруннинг синиши ва оёқ панжасининг синиши.
Уйғониб, ойнага қараганимни эслайман. Бир неча сония давомида қаршимдаги юзни танимадим: «Бундай бўлиши мумкин эмас. Бу мен эмасман», — деб ўйладим. Ўзимга қараб туриш мен учун қийин бўлди.
Аммо ташқи томондан ғалати туюладиган бир нарса содир бўлди. Ойнадаги аксга қараганимда, ўзимга нисбатан ҳурматим янада ошганини ҳис қилдим. Ҳатто ўзимни янада кўпроқ яхши кўриб қолганимни айтишим мумкин.
Мен боримни бердим, жангга яхши тайёргарлик билан келдим ва ҳам жисмонан, ҳам руҳан ўзимни яхши ҳис қилардим. Баҳона излашнинг ҳожати йўқ. Мен ҳаракат қилдим, аммо ўша кеча бунинг ўзи етарли бўлмади.
Шуни тушундимки, бу билан яшай оламан. Инсон ич-ичидан бор кучини берганини билса, натижа оғриқ беради, аммо уни йўқ қила олмайди. Мен ортга қайтишни, ўша кечани ўчиришни ёки ўз тарихимни ўзгартиришни истамадим», — деб ёзди Топурия ўз сайтида.
Топурия Гейжига техник нокаут билан мағлуб бўлганди. Тўртинчи раунддан сўнг Илиянинг бурчаги жангни давом эттирмасликка қарор қилди.
