Topuriya Geyji bilan jang haqida: «Oynaga qarab o‘zimni tanimadim»
Topuriya Geyji bilan jang haqida: «Oynaga qarab o‘zimni tanimadim»
Gruziyalik jangchi faoliyatidagi ilk mag‘lubiyat haqida batafsil to‘xtaldi.
UFC sobiq chempioni Iliya Topuriya Jastin Geyji bilan jangda olgan jarohatlari haqida gapirdi.
«Ko‘p yillar davomida men faqat bitta hisni — g‘alabani bilardim. Professional darajada 18 ta jang o‘tkazdim, ularning 17 tasi men xohlaganimdek yakunlangan, bittasi esa — yo‘q.
Professional faoliyatimda birinchi marta mag‘lub bo‘ldim. O‘sha kecha sportning avval hech qachon duch kelmagan tomonini o‘zim uchun kashf qildim: ikki ko‘z kosasi suyagining sinishi, burunning sinishi va oyoq panjasining sinishi.
Uyg‘onib, oynaga qaraganimni eslayman. Bir necha soniya davomida qarshimdagi yuzni tanimadim: «Bunday bo‘lishi mumkin emas. Bu men emasman», — deb o‘yladim. O‘zimga qarab turish men uchun qiyin bo‘ldi.
Ammo tashqi tomondan g‘alati tuyuladigan bir narsa sodir bo‘ldi. Oynadagi aksga qaraganimda, o‘zimga nisbatan hurmatim yanada oshganini his qildim. Hatto o‘zimni yanada ko‘proq yaxshi ko‘rib qolganimni aytishim mumkin.
Men borimni berdim, jangga yaxshi tayyorgarlik bilan keldim va ham jismonan, ham ruhan o‘zimni yaxshi his qilardim. Bahona izlashning hojati yo‘q. Men harakat qildim, ammo o‘sha kecha buning o‘zi yetarli bo‘lmadi.
Shuni tushundimki, bu bilan yashay olaman. Inson ich-ichidan bor kuchini berganini bilsa, natija og‘riq beradi, ammo uni yo‘q qila olmaydi. Men ortga qaytishni, o‘sha kechani o‘chirishni yoki o‘z tariximni o‘zgartirishni istamadim», — deb yozdi Topuriya o‘z saytida.
Topuriya Geyjiga texnik nokaut bilan mag‘lub bo‘lgandi. To‘rtinchi raunddan so‘ng Iliyaning burchagi jangni davom ettirmaslikka qaror qildi.
