The Ultimate Fighter 33. Фурқатбек Ёқубов иштирок этаётган вазнда иккинчи ярим финалчи аниқланди
11 июн куни тонгда The Ultimate Fighter 33 реалити-шоусининг учинчи қисми намойиш этилди. Бу галги эпизодда ўта енгил вазн тоифасида жанг ташкил этилди. Унда Даниэль Кормьенинг жамоасидан мексикалик Иманол Родригес (5–0) рақиби — Чейл Соннен бошчилигидаги жамоа аъзоси, ҳиндистонлик Аршиян Мемонни биринчи раунддаёқ мағлуб этди.
Шу тариқа, Иманол мазкур вазндаги иккинчи ярим финалчига айланди. Аввалроқ ушбу вазн тоифасидан Сонненнинг жамоасидан Моралес ярим финалга йўл олган эди.
Шоунинг навбатдаги қисмида ярим ўрта вазн тоифасида жанг бўлиб ўтади. Унда Кормьенинг америкалик шогирди Жефф Крейтон (11–2–1) ирландиялик Андреас Биндер (10–2) билан октагонда тўқнаш келади. Ушбу вазндаги илк ярим финалчи — Кормье жамоасидан украиналик Даниил Донченко бўлганди.
Шунингдек, ушбу лойиҳада иштирок этаётган ҳамюртимиз Фурқатбек Ёқубовнинг илк рақиби 18 июн куни намойиш этиладиган тўртинчи қисмда маълум бўлиши мумкин. Унга ярим финалга чиқиш йўлида қозоғистонлик Алиби Идрис ёки Жанубий Африка Республикаси вакили Тумело Маньямала рақиб бўлиши эҳтимолдан холи эмас.