Тарихий натижа қайд этган таеквондочиларимиз Ватанга қайтишди
Тошкент халқаро аэропортида 24-31 октябрь кунлари Хитойнинг Уси шаҳрида ўтказилган таеквондо WT бўйича катталар ўртасидаги Жаҳон чемпионатида муваффақиятли иштирок этган Ўзбекистон миллий терма жамоаси делегацияси кутиб олинди.
Унда Ўзбекистон Республикаси мудофаа вазирлиги ҳамда Ўзбекистон таеквондо WT ассоциацияси раҳбарияти, кенг жамоатчилик ва ОАВ вакиллари қатнашиб, тарихий натижа қайд этган спортчиларимиз ва мураббийларимизни муборакбод этишди.
Дунёнинг 150 дан ортиқ давлатидан 1000 нафарга яқин спортчи иштирок этган Жаҳон чемпионатида Ўзбекистон миллий терма жамоаси ҳам муваффақиятли иштирок этиб, 1 та олтин (Нажмиддин Қосимхожиев -74 кг), 1 та кумуш (Светлана Осипова +73 кг) ва 1 та бронза (Жаҳонгир Худойбердиев -54 кг) медалига эга чиқди.
