Таэквондо. Миллий терма жамоамиз Жаҳон чемпионатини тарихий натижалар билан якунлади
Хитойнинг Уси шаҳрида таэквондо WT бўйича етти кун давом этган катталар ўртасидаги Жаҳон чемпионати ўз ниҳоясига етди.
Биз учун аҳамиятлиси, дунёнинг 150 дан ортиқ мамлакатида 1000 нафарга яқин таэквондо усталари иштирок этган мазкур дунё биринчилигида Павел Хан бошчилигидаги Ўзбекистон миллий терма жамоаси аъзолари ҳам муносиб иштирок этиб, якунда спортчиларимиз томонидан 1 та олтин, 1 та кумуш ва 1 та бронза медали қўлга киритилди.
Олтин:
Нажмиддин Қосимхожиев (-74 кг).
Кумуш:
Светлана Осипова (+73 кг).
Бронза:
Жаҳонгир Худойбердиев (-54 кг).
Бу сафарги Жаҳон чемпионати биз учун ўзига хос натижаларга бой бўлди. Мисол учун, Нажмиддин ЖЧда олтин медални қўлга киритган иккинчи ўзбекистонлик эркак таэквондочига айланди. Светлана эса учинчи маротаба дунё биринчилиги шоҳсувасига кўтарилди. Ёш спортчимиз Жаҳонгир эса илк маротаба дунё биринчилиги медални қўлга киритди.
Шу тариқа, жамоамиз йилнинг энг муҳим турнирини юқори нотада якунлаб олди. Ғалаба муборак!
