Taekvando. Milliy terma jamoamiz Jahon chempionatini tarixiy natijalar bilan yakunladi
Xitoyning Usi shahrida taekvondo WT bo'yicha yetti kun davom etgan kattalar o'rtasidagi Jahon chempionati o'z nihoyasiga yetdi.
Biz uchun ahamiyatlisi, dunyoning 150 dan ortiq mamlakatidan 1000 nafarga yaqin taekvondo ustalari ishtirok etgan mazkur dunyo birinchiligida Pavel Xan boshchiligidagi O'zbekiston milliy terma jamoasi a'zolari ham munosib ishtirok etib, yakunda sportchilarimiz tomonidan 1 ta oltin, 1 ta kumush va 1 ta bronza medali qo'lga kiritildi.
Oltin:
Najmiddin Qosimxojiyev (-74 kg).
Kumush:
Svetlana Osipova (+73 kg).
Bronza:
Jahongir Xudoyberdiyev (-54 kg).
Bu safargi Jahon chempionati biz uchun o'ziga xos natijalarga boy bo'ldi. Misol uchun, Najmiddin JChda oltin medalni qo'lga kiritgan ikkinchi o'zbekistonlik erkak taekvondochiga aylandi. Svetlana esa uchinchi marotaba dunyo birinchiligi shohsupasiga ko'tarildi. Yosh sportchimiz Jahongir esa ilk marotaba dunyo birinchiligi medalini qo'lga kiritdi.
Shu tariqa, jamoamiz yilning eng muhim turnirini yuqori notada yakunlab oldi. G'alaba muborak!
