Спорт вазири Халқаро Шахмат федерацияси раиси билан учрашди
Спорт вазири Адҳам Икрамов Халқаро шахмат федерацияси (FIDE) бошқаруви раиси ўринбосари Дана Рейзниеце-Озола бошчилигидаги делегация билан учрашди.
Учрашувда жорий йилда Самарқандда бўлиб ўтадиган 46-Бутунжаҳон шахмат олимпиадаси ва имконияти чекланган шахматчилар ўртасида 3-FIDE шахмат олимпиадасига пухта тайёргарлик кўриш масалалари кўриб чиқилди.
Дастлаб, FIDE бошқаруви раиси ўринбосари Дана Рейзниеце-Озола Самарқанд вилоятига амалга оширган ташрифи давомида 46-Бутунжаҳон шахмат олимпиадаси ва имконияти чекланган шахматчилар ўртасида 3-FIDE шахмат олимпиадасини ўтказиш бўйича ўз таклифларини билдириб ўтди.
Ўз навбатида, мутахассислар мусобақа ўтказиладиган жойни, инфратузилмани ва ташкилотчилар билан тайёргарлик жараёнлари, меҳмонхоналар, транспорт ва бошқа муҳим жиҳатларни муҳокама қилишди.
Учрашувда нуфузли мусобақани юқори савияда ўтказиш, ҳар бир йўналиш бўйича ишларини самарали ташкил этиш ҳамда камчиликларни ўз вақтида бартараф этиш бўйича масъулларга тегишли тавсия ва кўрсатмалар берилди.
