Сирдарёда «Ҳоким Олимпиадаси» доирасидаги оғир атлетика баҳслари якунланди
Сирдарё вилоятида «Янги Ўзбекистон Олимпия чўққилари» ҳамда «Президент Олимпиадаси» спорт мусобақаларининг ҳудудий босқичи ҳисобланган «Сирдарё вилояти ҳокими Олимпиадаси» доирасида оғир атлетика бўйича мусобақалар юқори савияда ташкил этилди.
Беллашувлар Гулистон Олимпия ва Паралимпия спорт турларига тайёрлаш марказида ўтказилиб, унда вилоятнинг барча шаҳар ва туманларидан ташриф буюрган 13–14 ёшли ўғил-қизлар иштирок этди. Ёш атлетлар ўз вазн тоифаларида маҳорати ва имкониятларини намоён этиб, ғолиблик учун муросасиз кураш олиб бордилар.
Баҳслар якунига кўра, ўз вазн тоифаларида юқори натижаларни қайд этган спортчилар ғолиб ва совриндор деб топилиб, диплом, медал ҳамда эсдалик совғалари билан тақдирландилар. Шунингдек, улар «Президент Олимпиадаси» мусобақаларининг Республика босқичида Сирдарё вилояти шарафини ҳимоя қилиш ҳуқуқини қўлга киритди.