Сингапурда Asia Aquatics’нинг навбатдан ташқари Бош Қурултойи бўлиб ўтди
Сингапурда ўтказилаётган сув спорт турлари бўйича жаҳон чемпионати доирасида Asia Aquatics’нинг навбатдан ташқари Бош Қурултойи бўлиб ўтди. Қурултойда Asia Aquatics раҳбарияти, World Aquatics президенти Хусейн Аль-Мусаллам, қитъадаги миллий федерациялар вакиллари ҳамда “Uzbekistan Aquatics” федерацияси вице-президенти ва бош котиби Руслан Мустаев иштирок этди.
Анжуманда қатнашчилар расмий рўйхатдан ўтиб, Asia Aquatics президентининг очилиш нутқини эшитишди. Бош мурожаат билан World Aquatics раҳбари Хусейн Аль-Мусаллам сўзга чиқди. Кун тартиби доирасида унга Asia Aquatics’нинг Фахрий президенти унвонини бериш таклифи кўриб чиқилди ва ташкилотнинг 2024–2025 йиллардаги фаолияти ҳақида ҳисобот тақдим этилди.
Шунингдек, 2025 йил 10 май куни Кувейтда бўлиб ўтган Asia Aquatics Ижроия кенгаши йиғилишида қабул қилинган қарорлар муҳокама қилиниб, тасдиқдан ўтказилди. 2024 йил февралда бошланган янги ҳисобот даври учун молиявий ҳисобот ҳам тақдим этилди.
Ташкилий масалалар қаторида Вьетнамдан Бюро аъзосининг истеъфоси ва унинг ўрнига янги номзодни тасдиқлаш муҳокама қилинди. Шу билан бирга, навбатдаги Бош Қурултойнинг санаси ва ўтказилиш жойи белгилаб олинди. Йиғилиш кун тартиби ишчи масалалар муҳокамаси билан якунланди.
Asia Aquatics Бош Қурултойининг ўтказилиши Осиё минтақасида сув спорт турларини ривожлантириш ва халқаро ҳамкорликни мустаҳкамлаш йўлида муҳим қадам бўлди.
