Singapurda Asia Aquatics’ning navbatdan tashqari Bosh Qurultoyi bo‘lib o‘tdi
Singapurda o‘tkazilayotgan suv sport turlari bo‘yicha jahon chempionati doirasida Asia Aquatics’ning navbatdan tashqari Bosh Qurultoyi bo‘lib o‘tdi. Qurultoyda Asia Aquatics rahbariyati, World Aquatics prezidenti Xuseyn Al-Musallam, qit'adagi milliy federatsiyalar vakillari hamda “Uzbekistan Aquatics” federatsiyasi vitse-prezidenti va bosh kotibi Ruslan Mustaev ishtirok etdi.
Anjumanda qatnashchilar rasmiy ro‘yxatdan o‘tib, Asia Aquatics prezidenti ochilish nutqini tinglashdi. Bosh murojaat bilan World Aquatics rahbari Xuseyn Al-Musallam so‘zga chiqdi. Kun tartibi doirasida unga Asia Aquatics’ning Faxriy prezidenti unvonini berish taklifi ko‘rib chiqildi va tashkilotning 2024–2025 yillardagi faoliyati haqida hisobot taqdim etildi.
Shuningdek, 2025 yil 10 may kuni Quvaytda bo‘lib o‘tgan Asia Aquatics Ijroiya kengashi yig‘ilishida qabul qilingan qarorlar muhokama qilinib, tasdiqdan o‘tkazildi. 2024 yil fevralda boshlangan yangi hisobot davri uchun moliyaviy hisobot ham taqdim etildi.
Tashkiliy masalalar qatorida Vyetnamdan Byuro a’zosining iste’fosi va uning o‘rniga yangi nomzodni tasdiqlash muhokama qilindi. Shu bilan birga, navbatdagi Bosh Qurultoy sanasi va o‘tkazilish joyi belgilab olindi. Yig‘ilish kun tartibi ishchi masalalar muhokamasi bilan yakunlandi.
Asia Aquatics Bosh Qurultoyining o‘tkazilishi Osiyo mintaqasida suv sport turlarini rivojlantirish va xalqaro hamkorlikni mustahkamlash yo‘lida muhim qadam bo‘ldi.
