Шаржа шаҳрида от спортнинг тўсиқлардан сакраш (конкур) йўналиши бўйича нуфузли халқаро CSI5* мусобақа — H.H. Sharjah Ruler Cup 2026 бўлди
2026-йил 19–22-феврал кунлари Бирлашган Араб Амирликларининг Шаржа шаҳрида от спортнинг тўсиқлардан сакраш (конкур) йўналиши бўйича нуфузли халқаро CSI5* мусобақа — H.H. Sharjah Ruler Cup 2026 бўлиб ўтди.
Маълумки, CSI5★ йўналишлари мураккаблиги ва техник талаблари жиҳатидан олимпия ўйинлари йўналишларига тенглаштирилади. Тўсиқлардан сакраш (конкур) эса олимпия спорт тури ҳисобланади.
Мусобақанинг биринчи куни спорт отларининг ветеринария кўриги — ветчек (виводка) билан бошланди.
🇺🇿 Ушбу мусобақада Ўзбекистон терма жамоаси муносиб иштирок этди.
19-феврал — муқаддас Рамазон ойининг биринчи кунида Ўзбекистон мадҳияси халқаро майдонда янгради.
Ўзбекистон йилқичилик ва от спорти федерацияси раиси Баҳромжон Ғазиев CSI2★ йўналишида биринчи ўринни эгаллади.
Шунингдек, жамоамизнинг бошқа аъзолари CSI5★ даражасидаги мураккаб йўналишларда муваффақиятли иштирок этиб, кучли ўнликдан жой олди.
Терма жамоамизни ушбу натижалар билан табриклаймиз ва келгусида янада юксак марралар тилаймиз.
