Шарл Леклер: «Ростини айтсам, бошқа жойда ҳар бир деталга бу қадар катта эътибор қаратиладиганини кўрмаганман»
«Феррари» жамоаси пилоти Шарл Леклер Ўзбекистонга ташрифи ҳақида фикр билдирди. Монаколик пойгачи 12 декабрь куни Тошкентда бўлиб ўтган Халқаро автомобил федерацияси (FIA)нинг тантанали гала-кечасида иштирок этиш учун мамлакатимизга келган эди.
«Бу шунчаки ақлбовар қилмас даражада! Бугун кўрганларим мени ҳайратда қолдирди. Ростини айтсам, бошқа жойда ҳар бир деталга бу қадар катта эътибор қаратиладиганини кўрганимга ишончим комил эмас. Марказ жуда ажойиб. Мен бошқа мамлакатлар маданиятига катта қизиқиш билдираман. Ўзбекистон жуда бой ва қизиқарли тарихга эга. Бу ерга таклиф этилганимдан фахрланаман ва ушбу мамлакат ҳақида имкон қадар кўпроқ маълумот олишга ҳаракат қиляпман», — дея Леклернинг сўзларини келтиради RaceFans нашри.
Мавсум якунларига кўра, Шарл Леклер Формула-1 пилотлари умумий рейтингда 242 очко билан бешинчи ўринни эгаллади. Унинг жамоадоши, етти карра Формула-1 чемпиони британиялик Льюис Хэмилтон 156 очко билан олтинчи поғонадан жой олди. Жорий мавсумнинг жаҳон чемпиони эса «MCLaren» жамоаси пилоти Ландо Норрис бўлди.
