“Sharjah Masters 2025”: “Ўзбек дербиси”да яна Нодирбек Абдусатторов ғалаба қозонди
Бирлашган Араб Амирликларининг Шаржа шаҳрида мукофот жамғармаси 73,000 долларни ташкил этувчи “Sharjah Masters 2025” турнири бўлиб ўтмоқда.
Бугун мусобақанинг 4-тур баҳслари бўлиб ўтди. Унда Ўзбекистоннинг 4 нафар шахматчиси ўз партияларини ўтказди.
Жумладан, қора доналарда ҳаракат қилган Мўҳиддин Мадаминов мезбон шахматчиси Салех Салемга имкониятни бой бериб қўйди. Шунингдек, Жаҳонгир Воҳидов ҳам хитойлик Тао Пангга мағлуб бўлди.
Ушбу тур доирасида яна бир бор “ўзбек дербиси” бўлиб ўтди. Унда Нодирбек Абдусатторов ва Ортиқ Нигматов ўзаро дона сурди.
Оқ доналарда ҳаракат қилган Абдусатторов Нигматовнинг биргина хатосидан унумли фойдаланиб, ғалаба қозонди ва ўз очколари ҳисобини 3 тага етказиб олди.
Маълумот учун, мазкур турнир 26-май санасигача бўлиб ўтади ва шахматчилар 9 та тур давомида мусобақалашади. Вақт назорати эса 90 дақиқа ва ҳар бир юриш учун 30 сония қўшиб борилади (90+30).