“Sharjah Masters 2025”: “O'zbek derbisi”da yana Nodirbek Abdusattorov g'alaba qozondi
Birlashgan Arab Amirliklarining Sharja shahrida mukofot jamg'armasi 73,000 dollarni tashkil etuvchi “Sharjah Masters 2025” turniri bo'lib o'tmoqda.
Bugun musobaqaning 4-tur bahslari bo'lib o'tdi. Unda O'zbekistonning 4 nafar shaxmatchisi o'z partiyalarini o'tkazdi.
Jumladan, qora donalarda harakat qilgan Muhiddin Madaminov mezon shaxmatchisi Saleh Salemga imkoniyatni boy berib qo'ydi. Shuningdek, Jahongir Vohidov ham xitoylik Tao Pangga mag'lub bo'ldi.
Ushbu tur doirasida yana bir bor “o'zbek derbisi” bo'lib o'tdi. Unda Nodirbek Abdusattorov va Ortiq Nigmatov o'zaro dona surdi.
Oq donalarda harakat qilgan Abdusattorov Nigmatovning birgina xatosidan unumli foydalanib, g'alaba qozondi va o'z ochkolari hisobini 3 taga yetkazib oldi.
Ma'lumot uchun, mazkur turnir 26-may sanasigacha bo'lib o'tadi va shaxmatchilar 9 ta tur davomida musobaqalashadi. Vaqt nazorati esa 90 daqiqa va har bir yurish uchun 30 soniya qo'shib boriladi (90+30).
