Sharjah Masters 2025. Гроссмейстерларимиз 5-турда қандай натижа қайд этишди? Нодирбек Абдусатторов, Ортиқ Ниғматов ва бошқаларнинг ўйинлари ҳақида
БААнинг Шаржа шаҳрида давом этаётган нуфузли Sharjah Masters 2025 халқаро турнирида 5-тур учрашувлари якунланди. Жами 73 000 АҚШ доллари мукофот жамғармасига эга бўлган мазкур мусобақанинг кучлилар тўпланган “Masters” гуруҳида тўрт нафар юртдошимиз — Нодирбек Абдусатторов, Жаҳонгир Воҳидов, Муҳиддин Мадаминов ва Ортиқ Ниғматов муваффақиятли иштирок этмоқда.
5-турда қандай натижалар қайд этилди?
Нодирбек Абдусатторов венгриялик гроссмейстер Адам Козакга қарши қора доналарда дуранг ўйнади. Ушбу беллашувдан сўнг Нодирбекни Магнус Карлсенга қарши онлайн матч кутгани сабабли, у ғалаба учун таваккал қилмади.
Ортиқ Ниғматов оқ доналарда ҳиндистонлик Картик Венкатараманга қарши турда ҳам дурангга рози бўлди. Рақиб рейтингда ундан юқори турса-да, Ортиқ яхши ўйин намойиш этди.
Афсуски, Муҳиддин Мадаминов қозоғистонлик Ринат Жумабаевга, Жаҳонгир Воҳидов эса эронлик Моваҳед Синага қарши ўйинларда мағлуб бўлишди — ҳар иккиси ҳам оқ доналарда ҳаракат қилганди.
Турнир жадвалидаги ҳолат
5-турдан сўнг Даи Чангрен (Хитой), Аниш Гири (Нидерландия) ва Александар Инжич (Сербия) 4 очкодан тўплаб, пешқадамлик қилмоқда.
Нодирбек Абдусатторов 3,5 очко билан қўшимча кўрсаткичларга кўра 13-ўринда бормоқда.
Ортиқ Ниғматов — 3 очко, 24-ўрин.
Муҳиддин Мадаминов — 1,5 очко, 72-ўрин.
Жаҳонгир Воҳидов — 1 очко, 79-ўрин.
