Sharjah Masters 2025. Grossmeysterlarimiz 5-turda qanday natija qayd etishdi? Nodirbek Abdusattorov, Ortiq Nighmatov va boshqalarning o‘yinlari haqida
BAAning Sharja shahrida davom etayotgan nufuzli Sharjah Masters 2025 xalqaro turnirida 5-tur uchrashuvlari yakunlandi. Jami 73 000 AQSh dollari mukofot jamg‘armasiga ega bo‘lgan ushbu musobaqaning kuchlilar to‘plangan “Masters” guruhida to‘rt nafar yurtdoshimiz — Nodirbek Abdusattorov, Jahongir Vohidov, Muhiddin Madaminov va Ortiq Nighmatov muvaffaqiyatli ishtirok etmoqda.
5-turda qanday natijalar qayd etildi?
Nodirbek Abdusattorov vengriyalik grossmeyster Adam Kozakka qarshi qora donalarda durang o‘ynadi. Ushbu bellashuvdan so‘ng Nodirbekni Magnus Karlsenga qarshi onlayn match kutgani sababli, u g‘alaba uchun tavakkal qilmadi.
Ortiq Nighmatov oq donalarda hindistonlik Kartik Venkataramanga qarshi turda ham durangga rozi bo‘ldi. Raqib reytingda undan yuqori tursa-da, Ortiq yaxshi o‘yin namoyish etdi.
Afsuski, Muhiddin Madaminov qozog‘istonlik Rinat Jumabayevga, Jahongir Vohidov esa eronlik Movahhed Sinaga qarshi o‘yinlarda mag‘lub bo‘lishdi — har ikkisi ham oq donalarda harakat qilgandi.
Turnir jadvalidagi holat
5-turdan so‘ng Dai Changren (Xitoy), Anish Giri (Niderlandiya) va Aleksandar Injich (Serbiya) 4 ochkodan to‘plab, peshqadamlik qilmoqda.
Nodirbek Abdusattorov 3,5 ochko bilan qo‘shimcha ko‘rsatkichlarga ko‘ra 13-o‘rinda bormoqda.
Ortiq Nighmatov — 3 ochko, 24-o‘rin.
Muhiddin Madaminov — 1,5 ochko, 72-o‘rin.
Jahongir Vohidov — 1 ochko, 79-o‘rin.
