Sharjah Masters 2025: Абдусатторов 6-турда ғалаба қозониб, кучли учликка чиқди
73 минг долларлик соврин жамғармасига эга мазкур мусобақанинг “Masters” тоифасида тўрт нафар ўзбекистонлик гроссмейстер — Нодирбек Абдусатторов, Жаҳонгир Воҳидов, Муҳиддин Мадаминов ва Ортиқ Ниғматов иштирок этмоқда.
6-турда Нодирбек Абдусатторов оқ доналарда Ҳиндистон вакили Иниян Панини мағлуб этиб, очколарини 4,5 тага етказди ва мусобақа жадвалида соф учинчи ўринга кўтарилди. У биринчи рақамли иштирокчи сифатида чемпионлик учун жиддий даъвогарлик қилмоқда.
Қолган гроссмейстерларимиз бу турда муваффақиятсиз ўйинлар намойиш этишди: Ортиқ Ниғматов россиялик Давид Паравянга, Муҳиддин Мадаминов ҳиндистонлик Ароняк Гошга ютқазди. Жаҳонгир Воҳидов эса Абҳижит Гуптага қарши дуранг қайд этди.
Турнир жадвалида ҳозирча 5 очкодан жамғарган Аниш Гири (Нидерландия) ва Александар Инджич (Сербия) етакчилик қилмоқда. Нодирбек эса улардан ортидаги ягона шахматчи сифатида 4,5 очко билан учинчи поғонада жой олган.
Бугунги 7-тур доирасида Абдусатторов қора доналарда айнан етакчи Аниш Гирига қарши ўйнайди. Бу беллашув чемпионлик пойгасида ҳал қилувчи аҳамият касб этиши мумкин.
