Sharjah Masters 2025: Abdusattorov 6-turda g‘alaba qozonib, kuchli uchlikka chiqdi
73 ming dollarlik sovrin jamg‘armasiga ega mazkur musobaqaning “Masters” toifasida to‘rt nafar o‘zbekistonlik grossmeyster — Nodirbek Abdusattorov, Jahongir Vohidov, Muhiddin Madaminov va Ortiq Nighmatov ishtirok etmoqda.
6-turda Nodirbek Abdusattorov oq donalarda Hindiston vakili Iniyan Panini mag‘lub etib, ochkolarini 4,5 taga yetkazdi va musobaqa jadvalida sof uchinchi o‘ringa ko‘tarildi. U birinchi raqamli ishtirokchi sifatida chempionlik uchun jiddiy da’vogarlik qilmoqda.
Qolgan grossmeystrlarimiz bu turda muvaffaqiyatsiz o‘yinlar namoyish etishdi: Ortiq Nighmatov rossiyalik David Paravyanga, Muhiddin Madaminov hindistonlik Aronyak Goshga yutqazdi. Jahongir Vohidov esa Abhijit Gupta qarshi durang qayd etdi.
Turnir jadvalida hozircha 5 ochkodan jamg‘argan Anish Giri (Niderlandiya) va Aleksandar Indjich (Serbiya) yetakchilik qilmoqda. Nodirbek esa ulardan ortidagi yagona shaxmatchi sifatida 4,5 ochko bilan uchinchi pog‘onada joy olgan.
Bugungi 7-tur doirasida Abdusattorov qora donalarda aynan yetakchi Anish Giriga qarshi o‘ynaydi. Bu bellashuv chempionlik poygasida hal qiluvchi ahamiyat kasb etishi mumkin.
