Шахрилло Махмудов Халқаро оғир атлетика федерацияси Ижрокўм аъзолигига сайланди!
Жорий ҳафтада Саудия Арабистони пойтахти Ар-Риёд шаҳрида Халқаро оғир атлетика федерациясининг (IWF) ҳисобот-сайлов Конгресси бўлиб ўтди. Унда ташкилот раҳбариятига сайловлар ўтказилди.
Жумладан, IWFнинг амалдаги президенти Муҳаммад Жалуд 168 та овоз тўплаб, ушбу лавозимга қайта сайланди. Шунингдек, Урсула Папандреа биринчи вице-президент, Муҳаммад Ал-Ҳарби ҳамда Ченг Лянг Лю вице-президент, Хосе Куинос эса Бош котиб лавозимига сайланди.
Биз учун аҳамиятлиси, Ўзбекистон Республикаси Спорт вазири ўринбосари, мамлакат Оғир атлетика федерацияси раиси биринчи ўринбосари Шахрилло Махмудов Халқаро оғир атлетика федерациясининг Ижрокўм аъзолигига сайланди.
Қайд этиш лозимки, ушбу сайланган таркиб Халқаро оғир атлетика федерациясини 2029 йилгача бошқаради.
