Шахмат. Ўзбекистон чемпионати финалчилари маълум бўлди
Ўзбекистон шахмат чемпионатининг Юқори лига ярим финал босқичи якунланди. Эркаклар ўртасидаги мусобақада финал остонасида иқтидорли шахматчи Муҳаммадзоҳид Суяров тўхтатилди. У аввалроқ сенсацион тарзда гроссмейстер Шамсиддин Воҳидовни мағлуб этган эди. Ярим финалда Суяров Артик Нигматовга 0,5:1,5 ҳисобида ютқазди. Иккинчи ярим финалда Нодирбек Якуббоев Мухиддин Мадаминовни худди шундай ҳисобда — 1,5:0,5 — мағлуб этиб, финалга йўл олди.
Аёллар ўртасида тажрибали Нодира Нодиржонова ўсмирлар ўртасида икки карра жаҳон чемпиони Афруз Ҳамдамовага қарши кучли ўйин намойиш этиб, рақибанинг юқори рейтингига қарамай, 1,5:0,5 ҳисобида ғалаба қозонди. Финалда у Умида Омоновага қарши беллашади. Омонова кескин курашда Марёна Маликовани 3:1 ҳисобида мағлуб этди. Асосий босқич дуранг билан якунланган бўлса-да, тай-брейкдаги икки партияда Омоновагина ғалаба қозонди.
Финал ва учинчи ўрин учун учрашувлар 26 апрел куни, маҳаллий вақт билан соат 14:00 да бўлиб ўтади.
