Шахмат. Нега Магнус Tata Steelда иштирок этмаяпти?
Магнус Карлсен бу йил Вейк-ан-Зеедаги классик Tata Steel турнирида иштирок этиш имкониятини “жиддий кўриб чиққанини” айтди.
Карлсен йил давомида одатда фақат битта ёки кўпи билан иккита классик турнирда қатнашади. У учун сўнгги йилларда асосий классик мусобақа бўлиб келаётган турнир — бу ўз ватанидаги Norway Chess ҳисобланади. Бу йил Карлсеннинг Norway Chess турнирида иштирок этиши аллақачон тасдиқланган.
Шунингдек, TePe Sigeman турнирида қатнашиши эълон қилингани ҳам бироз ҳайрат уйғотди.
(Турнир Швециянинг Мальмё шаҳрида 1–7 май кунлари бўлиб ўтади (Norway Chess турнири бошланишидан бироз олдин — у 24 майда старт олади). Ўтган йили ушбу мусобақада Жавоҳир Синдоров ғолиб бўлган эди. Анъанага кўра, турнир ғолиби кейинги йил ҳам таклиф этилади. Шу боис, Карлсен ва Синдоров ўртасидаги навбатдаги қарама-қаршиликни яна кўришимиз эҳтимолдан холи эмас.)
Йил охирида эса Шахмат Олимпиадаси бўлиб ўтади. Аввалги Олимпиадада Карлсен Норвегия терма жамоасида биринчи доскада ўйнаган эди. Бу сафар эса Норвегия шахмат федерацияси жамоага кирмоқчи бўлган ҳар бир ўйинчи 2025-йил июнидан 2026-йил апрелига қадар камида 18 та классик партия ўйнашини мажбурий шарт қилиб қўйди.
— Мен бу йил Tata Steel турнирида ўйнаш имкониятини жиддий кўриб чиқдим. Баъзан ўзингга қийинчилик яратиш ва аслида унчалик ҳам хоҳламаган ишни қилиш фойдали, деб ҳисоблайман. Ростини айтсам, уч ҳафта давом этадиган классик турнирга вақт сарфлашни унчалик хоҳламаётган бўлсам ҳам, ўзимни шундай синовга мажбур қилиш баъзан фойдали бўлади, — деган эди Карлсен Барселонада ўтказилган ICE (International Casinos & Entertainment Expo) тадбиридаги матбуот анжуманида.
Кейин Карлсен нега барибир Tata Steel турнирида қатнашмасликка қарор қилганини тушунтирди:
— Мен бормасликка қарор қилганимнинг сабаби шундаки, ўғлим туғилгандан кейин бир неча ҳафта давом этган кучли чарчоқдан сўнг шундай хулосага келдим: агар имконият бўлса, мен уч ҳафта давом этадиган классик турнирларга вақт сарфлаб юрмоқчи эмасман, яхшиси бироз танаффус қиламан.
