Шахмат. Накамура нега freestyle бўйича жаҳон чемпионатидан воз кечди?
Маълумки, Ҳанс Ниман Freestyle Chess томонидан февраль ойида бўлиб ўтадиган расмий freestyle бўйича жаҳон чемпионати учун таклиф олди.
Дастлаб бу таклиф Хикару Накамурага берилиши режалаштирилган эди, бироқ у қатнашишдан бош тортди. Хўш, бунга нима сабаб бўлди?
— “Аслида, у таклиф қилинган эди,” — деди Freestyle Chess лойиҳаси асосчиси Бюттнер.
— “Аммо у иштирок этмасликни танлади, чунки у 2022-йилги Фишер шахмати бўйича жаҳон чемпиони сифатида хотирада қолишни истайди. Яна етти нафар ўйинчи билан, бу унвонни қайта қўлга киритиш эҳтимоли паст бўлган шароитда беллашишни хоҳламади,”
Бюттнернинг айтишича, Накамура Фишер шахматидаги етакчилик даври “у жаҳон чемпиони мақомида якунланган” ҳолатда эсда қолишини истаган.
Аммо Хикару Chess.com’га берган изоҳида (https://www.chess.com/news/view/freestyle-chess-fide-world-championship-partnership-2026) мутлақо бошқа вазиятни баён қилди.
— Бир неча ой олдин мени Freestyle 2026 турининг биринчи босқичига — худди шу формат ва мукофот жамғармаси билан — таклиф қилишган эди. Мен ҳаммага бу турнирда ўйнашимни айтгандим.
Бир неча кун олдин эса менга тўлиқ йиллик Freestyle тури бўлмаслиги маълум қилинди. Ўтказиладиган ягона тадбир эса атиги уч кунлик бўлиб, фақат rapid форматига оид. Режалаштирилган Freestyle тури ўрнига FIDE билан ҳамкорлик қилиб, буни энди “Жаҳон чемпионати” деб атай бошлашди. Ўйлайманки, бу тарихдаги энг шошилинч тарзда ташкил этилган жаҳон чемпионлиги бўлиши мумкин.
2025 йилда Вайзенхаусда бўлиб ўтган илк тадбир менга жуда ёққан эди ва классик вақт назоратидаги формат давом эттирилмаганидан афсусдаман. Бундан ташқари, бу мусобақа дастлаб режалаштирилган мукофот жамғармасининг учдан биридан ҳам кам маблағ билан, шошма-шошарликда ташкил этилгандек кўринмоқда ва энди у FIDE билан боғланган — бу эса, менинг фикримча, ижобий ўзгариш эмас.
Ташкилотчилардан кўплаб қўнғироқлар ва хабарлар бўлишига қарамасдан, мен бу турнирдаги ўрнимдан воз кечишга қарор қилдим. Март охири / апрел бошида мени кутяпган муҳим турнир бор ва бутун эътиборим айнан ўша мусобақага қаратилади, — дея хулоса қилди Накамура.
