Shaxmat. Nakamura nega freestyle bo‘yicha jahon chempionatidan voz kechdi?
Ma’lumki, Hans Niman Freestyle Chess tomonidan fevral oyida bo‘lib o‘tadigan rasmiy freestyle bo‘yicha jahon chempionati uchun taklif oldi.
Dastlab bu taklif Hikaru Nakamuraga berilishi rejalashtirilgan edi, biroq u qatnashishdan bosh tortdi. Xo‘sh, bunga nima sabab bo‘ldi?
— “Aslida, u taklif qilingan edi,” — dedi Freestyle Chess loyihasi asoschisi Byuttner.
— “Ammo u ishtirok etmaslikni tanladi, chunki u 2022-yilgi Fisher shaxmati bo‘yicha jahon chempioni sifatida xotirada qolishni istaydi. Yana yetti nafar o‘yinchi bilan, bu unvonni qayta qo‘lga kiritish ehtimoli past bo‘lgan sharoitda bellashishni xohlamadi,”
Byuttnerning aytishicha, Nakamura Fisher shaxmatidagi yetakchilik davri “u jahon chempioni maqomida yakunlangan” holatda esda qolishini istagan.
Ammo Hikaru Chess.comga bergan izohida (https://www.chess.com/news/view/freestyle-chess-fide-world-championship-partnership-2026) mutlaqo boshqa vaziyatni bayon qildi.
— Bir necha oy oldin meni Freestyle 2026 turining birinchi bosqichiga — xuddi shu format va mukofot jamg‘armasi bilan — taklif qilishgan edi. Men hammaga bu turnirda o‘ynashimni aytgandim.
Bir necha kun oldin esa menga to‘liq yillik Freestyle turi bo‘lmasligi ma’lum qilindi. O‘tkaziladigan yagona tadbir esa atigi uch kunlik bo‘lib, faqat rapid formatini o‘z ichiga oladi. Rejalashtirilgan Freestyle turi o‘rniga FIDE bilan hamkorlik qilinib, buni endi “Jahon chempionati” deb atashmoqda. O‘ylaymanki, bu tarixdagi eng shoshilinch tarzda tashkil etilgan jahon chempionligi bo‘lishi mumkin.
2025-yilda Vayzenxausda bo‘lib o‘tgan ilk tadbir menga juda yoqqan edi va klassik vaqt nazoratidagi format davom ettirilmaganidan afsusdaman. Bundan tashqari, bu musobaqa dastlab rejalashtirilgan mukofot jamg‘armasining uchdan biridan ham kam bo‘lgan mablag‘ bilan, shoshma-shosharlikda tashkil etilgandek ko‘rinmoqda va endi u FIDE bilan bog‘langan — bu esa, mening fikrimcha, ijobiy o‘zgarish emas.
Tashkilotchilardan ko‘plab qo‘ng‘iroqlar va xabarlar bo‘lishiga qaramay, men bu turnirdagi o‘rnimdan voz kechishga qaror qildim. Mart oxiri / aprel boshida meni kutayotgan muhim turnir bor va butun e’tiborim aynan o‘sha musobaqaga qaratiladi, — deya xulosa qildi Nakamura.
