Saint Louis Rapid & Blitz: Абдусатторов биринчи кунни уч америкалик рақибга қарши ўтказди
АҚШнинг Миссури штати Сент-Луис шаҳрида мукофот жамғармаси 175 минг доллар бўлган нуфузли Saint Louis Rapid & Blitz шахмат турнири старт олди. Бу мусобақа GCT туркумидаги тўртинчи босқич ҳисобланади ва унда дунёнинг етакчи гроссмейстерлари бош соврин учун курашмоқда. Турнир 15 августгача давом этади.
Тартибга кўра, дастлаб 3 кун рапид (25+10), кейинги 2 кун блиц (5+2) йўналишида баҳслар ўтказилади. Рапидда ғалаба 2 очко, блицда эса 1 очко билан баҳоланади. Рапид қисми 9 турдан, блиц қисми эса айлана тизимда 18 турдан иборат.
Биринчи кунги 3 рапид учрашувида Нодирбек Абдусатторов учала партияни ҳам америкалик гроссмейстерларга қарши ўтказди. У қора доналарда Уэсли Со билан дуранг қайд этди, кейин Фабиано Каруанага мағлуб бўлди. Учинчи турда Левон Аронянга қарши ютуқли позицияда хатога йўл қўйиб, аламли тарзда имкониятни қўлдан бой берди.
Бугун 4-турда ҳамюртимиз АҚШ вакили Григорий Опаринга қарши оқ доналарда ўйнайди. Кейин қора доналарда вьетнамлик Ле Куанг Льем ва оқ доналарда ҳиндистонлик жаҳон чемпиони Гукеш Доммараджуга қарши баҳс олиб боради.
