Россиялик гребчи Павел Эйгел Ўзбекистон терма жамоасига ўтди
Россиялик спортчи Павел Эйгел ўзининг спортчи сифатидаги фуқаролигини ўзгартириб, Ўзбекистон терма жамоаси сафида чиқишни бошлади. Бу ҳақда ТАСС агентлиги хабар берди. Эйгел таъкидлашича, унинг бундай қарор қабул қилишига россиялик спортчиларнинг халқаро мусобақаларда иштирок этишидаги чекловлар сабаб бўлмаган. Асосий омил – Россия терма жамоаси мураббийлар штаби томонидан қабул қилинган янги стратегия бўлган.
Унинг сўзларига кўра, Россияда терма жамоани ёшартириш сиёсатига ўтилган ва энди фақат 1994 йилда ёки ундан кейин туғилган спортчилар жамоа таркибига киритиляпти. 1990 йилда туғилган Эйгел эса асосий таркибдан чиқарилиб, захирага ўтказилган.
Павел Эйгел бу йил баҳордан бери Ўзбекистон терма жамоаси шарафини ҳимоя қилмоқда. У жорий мавсумда Таиландда ўтказилган мусобақада олтин медални қўлга киритди. Спортчи ўзининг асосий мақсади — Лос-Анжелесда бўлиб ўтадиган Олимпия ўйинларида иштирок этиш эканини қайд этди.
