Роналдуга тақлид қилган жангчи UFC билан шартнома имзолади
Бразилиялик MMA жангчиси Дуглас да Лапа Dana White's Contender Series турниридаги ғалабасидан сўнг UFC билан шартнома имзолади. 27 ёшли спортчи Дави Кабрални учинчи раундда техник нокаут билан мағлуб этди ва ғалабасини Криштиану Роналдунинг машҳур ҳаракати билан нишонлади. Бу ҳақда talkSPORT нашри хабар бермоқда.
Манбага кўра, да Лапа жангдан кейин Роналду унинг энг катта қаҳрамони эканини айтган. Бразилиялик спортчи португалиялик футболчининг меҳнатсеварлиги, интизоми ва доимо ғалабага интилишидан илҳом олишини таъкидлаган.
UFC раҳбари Дана Уайт жангчининг чиқишини юқори баҳолаб, унга ташкилот билан шартнома таклиф қилди. Бразилиялик спортчи учун бу профессионал фаолиятидаги энг муҳим воқеалардан бирига айланди. У UFC сафига қўшилишни узоқ йиллардан бери орзу қилганини билдирди.
Маълумот учун, Дуглас да Лапа профессионал MMA фаолиятида 7 та жанг ўтказиб, уларнинг барчасида ғалаба қозонган. Унинг навбатдаги рақиби ва UFCдаги дебют санаси ҳозирча маълум эмас.
