Расман: Ҳамзат Чимайев май ойида Шон Стриклендга қарши октагонга кўтарилади
Ўрта вазн тоифасида UFC чемпиони, 31 ёшли Ҳамзат Чимайев ўзининг навбатдаги жангини ўтказади. UFC ташкилотининг расмий ижтимоий тармоқлардаги саҳифаларида эълон қилинган хабарга кўра, Чимайев собиқ чемпион, америкалик Шон Стриклендга қарши октагонга чиқади.
Ушбу қарама-қаршилик 9 май куни бўлиб ўтадиган UFC 328 турнирининг марказий жанг мақомида ўтказилади.
Эслатиб ўтамиз, Ҳамзат Чимайев 2025 йил 17 август куни Жанубий Африка вакили Дрикус дю Плессига қарши беш раундлик жанг ўтказиб, ҳакамларнинг бир овоздан қабул қилган қарори билан ғалаба қозонган эди.
Унинг рақиби Шон Стрикленд эса ўзининг охирги жангини жорий йилнинг 22 февраль куни Хьюстон шаҳрида ўтказди. Мазкур тўқнашувда Стрикленд америкалик Энтони Эрнандес устидан учинчи раундда техник нокаут эвазига зафар қучган эди.
