Рамазон Темировнинг жанг бекор қилинди — сабаб допинг
26 июл куни Абу-Дабида ўтказилиши режалаштирилган Рамазон Темиров ва Асу Алмабаев ўртасидаги жанг бекор қилинди. Бу ҳақда Темировнинг ўзи маълум қилди.
Унинг сўзларига кўра, жангнинг бекор қилинишига жароҳат эмас, балки допинг билан боғлиқ муаммо сабаб бўлган:
“Мен ҳам, рақибим ҳам жароҳат олмадик. Муаммо бизнинг томондан юзага келди. Таиландга келган пайтимда танамда ҳар хил инфекцион яралар пайдо бўлди. Бу ерга янги келган спортчиларда тез-тез учрайдиган ҳолат экан. Шундан сўнг диетологим менга дори ёзиб берди ва мен уни қабул қилдим. Орадан 3-4 кун ўтиб, допинг назорати таҳлил олиб кетди.
Яқинда чиққан натижаларга кўра, ичган дорим таркибида тақиқланган модда мавжуд экани аниқланган. Шу боисдан жангимиз бекор қилинди. Ҳаммаси Аллоҳнинг хоҳиши билан. Биз ҳеч қачон рақиб танламаганмиз, фақатгина Аллоҳдан қўрқамиз. Иншааллоҳ, яқин кунларда янги жангимиз аниқланади”, — деди Темиров.
Темировнинг навбатдаги қачон ва қаерда жанг қилиши ҳозирча маълум эмас.
