Presidential Cycling Tour of Türkiye кўп кунлик мусобақасида Ўзбекистон велоспорти учун тарихий натижа қайд этилди
Туркия давлатида ўтаётган нуфузли “Presidential Cycling Tour of Türkiye” кўп кунлик мусобақасида Ўзбекистон велоспорти учун тарихий натижа қайд этилди. Италиянинг "Bardiani CSF 7 SABER" профессионал жамоасида фаолиятини давом эттираётган Ўзбекистон миллий терма жамоаси аъзоси Никита Светков мусобақанинг 5-босқич пойгасида маррага учинчи бўлиб етиб келди ва бронза медалига эга чиқди.
Ушбу босқичда велопойгачилар 180,7 км масофани босиб ўтишди. Бу 2026 йилги турнирнинг энг узун ва мураккаб босқичларидан бири бўлиб, бунда спортчидан нафақат тезлик, балки катта жисмоний тайёргарлик, чидамлилик, тактик фикрлаш ва кучни тўғри тақсимлаш талаб этилади. 5-босқич якунида Нидерландиялик Каспер ван Уден ғолибликни қўлга киритган бўлса, иккинчи ўринни Марчин Будзински эгаллади. Учинчи ўринда финиш чизиғини босиб ўтган Ўзбекистон вакили эса 4:06:09 натижа кўрсатди.
Эслатиб ўтамиз, “Presidential Cycling Tour of Türkiye” халқаро велоспорт тақвимидаги энг нуфузли мусобақалардан бири ҳисобланади. Жорий йилги мусобақада 23 та профессионал жамоадан 161 нафар спортчи иштирок этмоқда. Улар орасида WorldTour, ProTeam ва Continental мақомидаги жамоалар ва спортчилар бор.
Бу натижа мамлакатимиз велоспорти учун алоҳида аҳамиятга эга. Сабаби, UCI ProSeries тақвимига киритилган 2.PRO тоифасидаги бундай юқори даражали халқаро пойгада Ўзбекистон вакилининг шоҳсупага кўтарилиши сўнгги 20 йилдаги энг муҳим спорт воқеаларидан бири сифатида баҳоланмоқда!
