PFL жангчиси чемпионлик жанги учун сочини олдирди
Америкалик ММА жангчиси Лиз Кармуш PFL чемпионлик жанги олдидан ғайриоддий қарори билан эътиборни тортди. 42 ёшли спортчи белгиланган вазнга тушиш учун расмий вазн ўлчаш маросими олдидан сочини бутунлай олдирди. Бу ҳақда MMA Fighting нашри хабар бермоқда.
Манбага кўра, Кармуш 16 октябрь куни Жена Бишопга қарши вакант чемпионлик камари учун жанг қилади. Спортчи вазн ўлчаш маросимида таваккал қилишни истамаган ва сочини олдиргач, тарозида аниқ 125 фунт натижани қайд этган.
Унинг рақиби Жена Бишоп эса 124,6 фунт вазн кўрсатган. Шу тариқа, икки спортчи ҳам чемпионлик жанги учун қўйилган талабларни бажарган. Уларнинг аввалги учрашуви 2025 йил августида бўлиб ўтган ва ўшанда Кармуш нокаут эвазига ғалаба қозонган эди.
Маълумот учун, Кармуш Bellator ташкилотининг собиқ чемпиони ҳисобланади. У сўнгги тўртта жангида ҳам ғалаба қозонган. PFL Chicago турниридаги реванш эса аёллар ўртасидаги энг енгил вазн чемпионлик камарининг янги соҳибини аниқлаб беради.
