Пэдди Пимблетт октагонга қайтиш вақти ҳақида маълум қилди
UFC’нинг енгил вазн тоифасида (70 кг) 8-ўринни эгаллаб турган британиялик жангчи Пэдди Пимблетт навбатдаги жангини қачон ўтказиши мумкинлигини очиқлади.
“Чендлер билан жангдан олдин ҳам, менинг октябрь ойида Абу-Дабидаги турнирда октагонга чиқишим керак эди. UFC ҳар йили БАА пойтахтида рақамланган турнир ташкил этади. Мен ана шу шоуда жанг қилишни орзу қиламан. Ўйлашимча, октябрь ойи мен учун навбатдаги жангга қайтиш учун идеал вақт бўлади”, — деди Пимблетт ўзининг YouTube-каналидаги подкастда.
Маълумот учун, 30 ёшли Пимблетт 2021 йилдан бери UFC таркибида жанг қилиб келади. Унинг ҳисобида 7 та ғалаба бор ва ҳозиргача мағлубиятга учрамаган. Сўнгги жангини у март ойида UFC 313 турнири доирасида Майкл Чендлерга қарши ўтказиб, рақибини техник нокаут билан мағлуб этган эди.
