Paddy Pimblett okatonga qaytish vaqti haqida ma'lumot berdi
UFC’ning engil vazn toifasida (70 kg) 8-o‘rinda joylashgan britaniyalik jangchi Paddy Pimblett navbatdagi jangini qachon o‘tkazishi mumkinligini ochiqladi.
“Chandler bilan jangdan oldin ham, men oktyabr oyida Abu-Dabidagi turnirda okatonga chiqishim kerak edi. UFC har yili BAA poytaxtida raqamlangan turnir tashkil qiladi. Men aynan shu shouda jang qilishni orzu qilaman. O‘ylashimcha, oktyabr oyi men uchun navbatdagi jangga qaytish uchun ideal vaqt bo‘ladi”, — dedi Pimblett o‘zining YouTube-kanalidagi podkastda.
Ma’lumot uchun, 30 yoshli Pimblett 2021 yildan beri UFC tarkibida jang qilib keladi. Uning hisobida 7 ta g‘alaba bor va hozirgacha mag‘lubiyatga uchramagan. So‘nggi jangini u mart oyida UFC 313 turniri doirasida Michael Chandlerga qarshi o‘tkazib, raqibini texnik nokaut bilan mag‘lub etgan edi.
