Қозоғистон оғир атлетика федерацияси вице-президенти Ўзбекистон оғир атлетика федерациясида меҳмон бўлди
Қозоғистон оғир атлетика федерацияси вице-президенти Жамбулат Зиадин Ўзбекистон оғир атлетика федерациясига ташриф буюрди. Меҳмонни Ўзбекистон оғир атлетика федерацияси раиси биринчи ўринбосари Шахрилло Махмудов қабул қилди.
Учрашув давомида икки қардош мамлакат ўртасидаги спорт соҳасидаги ҳамкорлик алоқаларини янада ривожлантириш ва мустаҳкамлаш масалалари муҳокама қилинди. Томонлар оғир атлетикани янада ривожлантириш, терма жамоаларнинг халқаро майдондаги рақобатбардошлигини ошириш ҳамда истиқболдаги йирик мусобақаларга биргаликда тайёргарлик кўриш бўйича фикр алмашдилар.
Шунингдек, айни кунларда Ўзбекистонда ўтказилаётган қўшма ўқув-машғулот йиғинларининг самарадорлиги алоҳида эътироф этилиб, бундай йиғинларни келгусида хорижий мамлакатларда ҳам ташкил этиш юзасидан таклифлар илгари сурилди.
Таъкидлаш жоизки, сўнгги йилларда Ўзбекистон ва Қозоғистон оғир атлетика федерациялари ўртасидаги ҳамкорлик алоқалари изчил ривожланиб бормоқда. Ҳар икки мамлакатда мунтазам равишда қўшма ўқув-машғулот йиғинлари ташкил этилиб, спортчилар ва мураббийлар ўртасида тажриба алмашиш йўлга қўйилган. Мазкур ҳамкорлик спортчиларнинг маҳоратни ошириш, халқаро мусобақаларга пухта тайёргарлик кўриш ҳамда икки мамлакат спорт дўстлигини янада мустаҳкамлашга хизмат қилмоқда.
