От спорти. Бекзод Курбановнинг спорт оти Америка сари йўлга чиқди
Аввал хабар берганимиздек, Ўзбекистон терма жамоаси аъзоси, чавандоз Бекзод Курбанов от спортинг тўсиқлардан сакраш (конкур) йўналиши бўйича Жаҳон кубоги финалида иштирок этиш ҳуқуқини қўлга киритган эди. Мазкур мусобақа 8–12 апрел кунлари АҚШнинг Техас штатида бўлиб ўтади.
Бугун муҳим босқич бошланди — Бекзод Курбановнинг спорт оти халқаро сафарга йўл олди. Парвоз йўналиши Европа орқали амалга оширилмоқда: Польшадан🇵🇱 Бельгияга, ундан эса тўғридан-тўғри Америка Қўшма Штатларига🇺🇸.
Режага кўра, от эртага АҚШга етиб боради ва у ерда мусобақа олдидан якуний тайёргарлик ишлари давом этади.
Бу воқеа Ўзбекистон от спорти учун муҳим аҳамиятга эга. Жаҳон кубоги финалида иштирок этиш — нафақат катта ютуқ, балки катта масъулият ҳамдир.
Бекзод Курбановга омад, муваффақиятли иштирок ва юқори натижалар тилаймиз! Барчамиз чавандозимизни қўллаб-қувватлаймиз!
