От спорти. Бекзод Курбанов — Жаҳон кубоги финалидаги ишончли чиқиш
Жорий йил Ўзбекистон от спорти тарихида муҳим воқеа бўлди — Бекзод Курбанов илк бор бир йилда энг йирик халқаро мусобақаларга йўлланмани қўлга киритди.
Спортчи ўзининг биринчи йўлламаси орқали АҚШнинг Техас штати, Даллас шаҳрида бўлиб ўтаётган Жаҳон кубоги финалида иштирок этмоқда.
9-апрел куни бошланган мусобақада Бекзод Курбанов Маттс VG лақабли оти билан 160 см баландликдаги мураккаб маршрутларда қатнашиб, жаҳоннинг энг кучли чавандозлари билан бир сафда муносиб кураш олиб борди.
10-апрел куни (Тошкент вақти билан 11-апрел соат 05:00 да) ўтган иккинчи кун баҳсларида ҳам у ўзини юқори даражада намоён этди.
Бекзод Курбанов ва Маттс VG лақабли оти маршрутни аниқ, пухта ва ишонч билан босиб ўтди. Ҳар бир тўсиққа кириш, бурилишлар ва масофалар профессионал даражада бажарилди. Бу эса унинг техник тайёргарлиги ва мусобақа тажрибаси юқори эканини яна бир бор исботлади.
Иккинчи кун якунларига кўра ғолиблар:
Кент Фаррингтон — Грея
Айкен Сато — Чаделлано JRA
Кевин Стаут — Висконти ду Телман
Шунингдек, жорий мавсумда Бекзод Курбанов яна бир улкан натижага эришиб, 🇩🇪Германиянинг Ахен шаҳрида бўлиб ўтадиган Жаҳон чемпионатига ҳам йўлланмани қўлга киритган.
Бу натижалар Ўзбекистон от спорти янги босқичга кўтарилаётганини яққол кўрсатмоқда.
