От спорти. Бекзод Курбанов АҚШда бўлиб ўтадиган Жаҳон кубоги финалида иштирок этади
7–12-апрель кунлари АҚШнинг Техас штатида от спортининг тўсиқлардан сакраш (конкур) йўналиши бўйича Жаҳон кубоги финали — халқаро даражадаги энг нуфузли мусобақалардан бири бўлиб ўтади.
Ушбу нуфузли турнирда дунёнинг энг кучли спортчилари қаторида Ўзбекистон терма жамоаси вакили Бекзод Курбанов ҳам иштирок этади. У финалда қатнашиш учун расмий лицензияни қўлга киритган.
Эътиборлиси, мусобақада бутун дунёдан атиги 36 нафар энг кучли чавандоз иштирок этади. Ушбу рўйхатга киришнинг ўзи катта ютуқ ва спортчининг юқори даражасини тасдиқлайди. Б. Курбанов ана шундай нуфузли майдонда иштирок этиш ҳуқуқини қўлга киритган кам сонли спортчилардан биридир.
Спортчимиз ушбу мусобақада Ўзбекистонни халқаро майдонда муносиб тарзда ҳимоя қилади. Бу эса мамлакатимизда от спортни янада ривожлантириш ҳамда унинг халқаро нуфузини мустаҳкамлаш йўлида муҳим қадамдир.
Жаҳон кубоги финали анъанавий тарзда от спорти элитасини жамлайди. Унда иштирок этиш нафақат катта шараф, балки юқори даражадаги маҳорат ва пухта тайёргарликни талаб қиладиган жиддий синовдир.
Бутун мамлакатимиз спортчимиз ушбу муҳим стартдаги иштирокини катта қизиқиш билан кузатиб, уни қўллаб-қувватлайди.
