Осиё кубоги-2026 саралаш босқичига қуръа ташлаш қачон бўлиши маълум. Ўзбекистон биринчи саватчада
Индонезия давлати мезбонлик қилиши режалаштирилган футзал бўйича "Осиё кубоги-2026" турнирининг саралаш босқичида иштирок этувчи жамоалар маълум бўлди.
ОФК қитъа кубоги саралаш босқичида 30 терма жамоа иштирок этишини тасдиқлади.
Жамоалар 4 та саватга ажратилди. Саватлар терма жамоаларнинг ФИФА рейтингидаги ўрнига кўра тақсимланган бўлиб, Ўзбекистон миллий терма жамоаси Эрон, Таиланд, Япония, Вьетнам, Афғонистон, Қувейт ва Ироқ термалари билан биргаликда 1-саватдан жой эгаллади.
Турнирнинг финал босқичи мезбони тўғридан-тўғри йўлланмага эга бўлади. Саралаш босқичида 3 та жамоадан иборат бўлган икки гуруҳ ва 4 та жамоадан ташкил топган яна олти гуруҳ шакллантирилади. Кейинги босқичга жами 15 жамоа йўл олади. Улардан 8 таси ўз гуруҳида ғолибликни қўлга киритганлар бўлса, қолган 7 жамоа номи гуруҳларнинг энг яхши 2-ўринларидан аниқланади.
Мусобақа учун қуръа ташлаш маросими 26-июн санада ОФКнинг Куала-Лумпур шаҳридаги штаб-квартирасда бўлади. Турнир эса жорий йилнинг 16-24-сентябрь кунлари ўтказилиши режалаштирилган.
