Осиё ўйинлари олдидан Кураш бўйича халқаро тест мусобақаси ўтказилди
Осиё ўйинлари олдидан Кураш бўйича халқаро тест мусобақаси ўтказилди.
Япониянинг Нагоя шаҳрида кураш бўйича XX-Ёзги Осиё ўйинлари-2026 олдидан халқаро тест мусобақаси муваффақиятли ташкил этилди. Ушбу турнир Осиё ўйинлари дастурига киритилган кураш беллашувларини амалга ошириш бўйича ташкилий, техник ва операцион жараёнларни синовдан ўтказишнинг муҳим босқичи сифатида баҳоланмоқда.
Мусобақада Япония, Таиланд, Корея Республикаси, Хитой Тайпейи, Вьетнам ҳамда Жанубий ва Жануби-Шарқий Осиёнинг бир қатор давлатларидан келган миллий терма жамоалар иштирок этди. Беллашувлар 20-Осиё ўйинлари дастурига мувофиқ вазн тоифаларида ўтказилди: эркаклар ўртасида -66 кг, -81 кг ва +90 кг, аёллар ўртасида эса -57 кг, -78 кг ва +87 кг вазн тоифаларида ғолиблар аниқланди.
Тест мусобақаси 20-Осиё ўйинлари Ташкилий қўмитаси билан ҳамкорликда ўтказилиб, асосий эътибор мусобақа логистикаси, электрон бошқарув тизимлари, ҳакамлик жараёнлари ҳамда умумий операцион механизмларни реал шароитда синовдан ўтказишга қаратилди.
Икки кун давом этган беллашувлар давомида халқаро техник расмийлар (ITO) фаолияти ҳам амалиётда текширилди. Бу эса келгуси Осиё ўйинлари доирасида спорт мусобақаларини юқори стандартларда ташкил этишга хизмат қилади.
Мусобақа жараёнлари Халқаро Кураш Ассоциацияси (IKA) раҳбарияти томонидан ҳам кузатиб борилди. IKA Биринчи вице-президенти Зиёвиддин Хожиниёзов, IKA Техник директори Рави Капур ҳамда Ассоциация Администрацияси раҳбари Мансур Мирзаев, IKA спорт комиссияси Раиси Бае Хионгсик турнирнинг ташкилий ва техник жараёнларида иштирок этди.